১। উজাই আহিলে, আইৰে সাতেভনী এ
শীতলি পায়ে চলাই,
টেমাতে আনিছে ফুলে চন্দনে
সবাকো যাব বিলাই ।
২। বাটো সাৰিলো, পদূলিও সাৰিলো
নঙলা মুখলৈ চায়,
আহে আহে বুলি বাট চায় আছিলো
পালেহি ৰূপহী আই ।
৩। মুৰত ফুলৰ চৰু লৈ
ভৱানীক আদৰোগৈ,
আহিছে ভৱানী জগত জননী
চায়া দি ৰাখিবলৈ ।
৪। আইৰে পাৱে মচা কপাহী গামোছা এ
আইৰে জালিকতা পীৰা,
বৰ আই পাচিছে সৰু আই আহিছে
ফুলবাৰী দেওঘৰৰ পৰা ।
৫। আই মোৰ আসনৰ আগতে
আই মোৰ গুৱা কাটি থৈছো
আই মোৰ উলাওঁতে সোমাওঁতে খাবা
আই মোৰ চৰুত পাৱে ধূবা
আই মোৰ আসনত বহিবা
আই মোৰ দাসক দয়া কৰি যাবা ।
৬। আসনতে বহি আয়ে এ নমাই থৈছে ভৰি,
গুপীনীয়ে স্তুতি কৰে, কৃতাঞ্জলী কৰি ।
আসনৰে চৌপাশে এ ঘট শাৰী শাৰী,
আসনতে বঢ়ি আছে জীৱৰ অধিকাৰী ।
চহৰ ফুৰি আই আহে এ জাই মালতী ফুল
আমপাতৰ চাতি মাৰি হৃদয় কৰে জুৰ ।
৭। আইৰে মাননী শুকান পিঠাগুৰি এ
গোপীনীৰ মাননী গুৱা
মহাদেৱৰ মাননী দোৰুণ ফুলৰ মালা
নমাইছে বিমানৰ পৰা ।
৮। দুখীয়াৰ ঘৰলৈ আইলোক আহিছে এ
দিবলৈ নাইকীয়া একো
মুৰৰ কেশ ছিঙি পাৱ মচি দিমে
দেহৰ পাৰি দিমে সাঁকো ।
৯। লুইতৰে বালি তিয়াব নোৱাৰি এ
বৰুণে নিদিয়ে মানে
মনুষ্য পোৱালী তুলিব নোৱাৰি এ
আয়ে পাৱ নুফুৰাই মানে ।
১০। দুখীয়াৰ পুতলাক আইয়ে দাঙি ধৰে এ
আইৰ মান মৰমী নাই,
কি চৰাই নাছিছে আইয়ে ফুল বাছিছে
দুখীয়াৰ ঘৰে সোমাই ।
১১।আই মাতৃ ভগৱতী এ
নামে সন্তোষ হোৱা
নামেৰে পূজিম মাতৃ
গধূলি যে পুৱা ।
আৰৈ চাউল মুঠি মুঠি এ
তুলসী চন্দন,
সেৱা কৰি বিদায় মাগো
দুখানি চৰণ ।